Lagot kayong lahat...

Ignorance is bliss. Little knowledge is danger. Pero sa mga panahong ito, sino nga ba talaga ang nakakaalam?

Itong ginagawa ko, itong sinasabi ko, lahat ay against my nature. Hindi ko naman kinokonsidera ang sarili ko bilang 'tibak-minded'. Pero di naman kailangan ng sobrang talino para maintindihan natin na natatapakan na ang ating pagkatao. Ano na ang nangyari sa mga pangarap mo para sa iyong sarili, para sa mga mahal mo, para sa bansa, para sa mundo? Ang mga di natupad na pangarap na yan ang magsasabi sa iyo ng tunay na kalagayan nating lahat.

Nasa iyo ang pasya. Maraming paraan, di lang naman pagpapaka-tan sa EDSA (o Mendiola, o Makati, o kahit saan pa).


Alam kong malabo talaga ako.

Ito galing sa nanay ko. Mas makabuluhan tong sinulat niya kaysa sa lahat ng tula-tulaang sinulat ko sa buong buhay ko.

Pagluluksa at Pagmumulto ng People Power

Minsang pinagmamalaking People Power
Naiintindihan mo ba?
Kapa-kapain mo,
pakiramdaman mo
kaya mo bang magagap?
Na minsan sa gitna ng mga tangke at baril
pumagitna ang walang puknat na pila ng nagmamartsa
Hanay-hanay:
makinis at galisin
nangangamoy YSL at amoy araw
nagdi-dyeta at gutom
naka-Our Tribe, naka-Addidas, naka-sinelas, nakatapak, at nakasaklay
naka-baseball cap, naka-payong, naka-tubaw, naka-belo
dilaw at pula
MINSANg pagkakataong nagbigkis…

Sana maisip mo rin
na maraming taon
bago pa man humantong sa matagumpay na pagbibigkis na yaon
ay maraming dugo na ang naibuhos
sandamukal na kaluluwa
na humihingi ng katarungan
di-lamang para sa kanilang pansariling kapayapaan at hustisya
kundi, pangunahin, sa matagal nang pagdurusa ng taong-bayan…

dahil kung hindi mo paniniwalaan
na mamumuhunan ka ng sangkaterbang buhay di –lamang pawis at laway
upang humantong sa nakaka-high na people power;
at di-lamang sa loob lang nga ba ng isang linggo
kinayang puksain ang diktadurya…

…baka multuhin ka ng mga TUNAY na mga katauhan
sa likod ng pagwawagi…
huwag naman sanang mawalan ng saysay ang kanilang
kaBAYANIhan.

At pagkatapos noon, akala ng lahat
Tapos na ang kabuktutan
Tapos na ang gutom
Tapos na ang pangsa-salvage…

Ngunit sa isang iglap lang
Di-man lang pumakabilang henerasyon
Nasaan na ang pinaglaban?

Damhin mo ang pintig
Ng muling panaghoy
sa bukid,
sa estero,
sa pabrika;

Damhin ang pintig
Ng sisinghap-singhap na pag-asa
mga rosaryong halos mapatid sa taimtim ng dasal,
mga pila sa lotto, pera o bayong,
mga impok na ine-estafa ng illegal recruiter.

Nasa hukay na nga ba ang pamana ng EDSA?
Siguro nga...
Dahil balita ko, may minumulto sa palasyo.

mayo
17 peb 2006